Vélhjólaklúbbur Frímúrara

Um Fenri

Fyrir hverja er Fenrir?

Fenrir er bifhjólaklúbbur Frímúrara á Íslandi.  Eingöngu meðlimir í Frímúrarareglunni á Íslandi og fjölskyldur þeirra fá aðgang að klúbbnum.

Hvenær var Fenrir stofnaður?

Fenrir var formlega stofnaður þann 23. apríl 2008 – á sumardaginn fyrsta.  Starfsemi klúbbsins fór frekar hægt af stað, svo sem gjarnan gerist með félagsstarf almennt, þrátt fyrir að um fimmtíu (50) stofnfélagar mættu til fundarins.  Starfsemi klúbbsins jókst mikið strax á öðru starfsári og hefur verið blómleg síðan. Núverandi félagatala er í kringum eitt hundrað og tíu (110) og er klúbburinn því með stærri mótorhjólaklúbbum á landinu.  Starfssvæði klúbbsins er allt landið en sérstök Norðurdeild starfar á Akureyri.

Hjóladagar Fenris eru 1. og 3. þriðjudagur í mánuði frá maí til október ár hvert.

Hvert er markmið klúbbsins?

Markmið klúbbsins er m.a. að:

  • efla bifhjólamenningu meðal félagsmanna klúbbsins;
  • standa fyrir skipulögðum uppákomum fyrir félagsmenn s.s. félagsfundum, hópkeyrslum o.fl. í þeim dúr;
  • auka umferðaröryggi meðal félagsmanna klúbbsins;
  • standa fyrir ýmisskonar fræðslustarfsemi m.a. um umferðaröryggi, bifhjól og bifhjólamenningu o.fl.

Hvað táknar merki klúbbsins?

Merki klúbbsins sýnir Fenrisúlfinn, sem er velþekktur úr goðafræðinni.  Um úlfinn segir m.a. á Wikipedia, frjálsa alfræðiritinu (is.wikipedia.org/wiki/Fenrisúlfur):

Fenrisúlfur (einnig Hróðvitnir „Hinn frægi úlfur“) er úlfur, sonur Loka og Angurboðu í norrænni goðafræði. Systkini hans voru Miðgarðsormur og Hel. Þau voru send í burt fljótlega eftir að þau fæddust. Varast ber að segja Fernisúlfur eins og sumir gera og tengja (óafvitandi) fyrri hluta orðsins við fernisolíu.

 

Fenrisúlfur fjötraður

Í upphafi stóð ekki mikil ógn af Fenrisúlfi, en hann stækkaði fljótt og ógnaði að lokum jafnvel ásunum. Æsir urðu að gera eitthvað í málunum og ákváðu að binda hann fastan. Fyrst bjuggu þeir til fjötur sem hét Læðingur. Þeir sögðu Fenrisúlfi að frægð og frami myndi fylgja honum ef að honum tækist að leysa sig úr þeim fjötri. Fenrisúlfi fannst það lítið mál að slíta sig úr því. Þaðan er komið máltækið „að leysa úr læðingi“ sem merkir „að kalla eitthvað fram“.

Æsir ákváðu að búa til nýjan fjötur sem kallaður var Drómi og var tvöfalt sterkari en Læðingur. Sögðu æsin þá að tvöföld frægð biði hans ef honum tækist að leysa sig úr þessum fjötri. Úlfurinn fer létt með það að leysa sig úr reipinu. Þaðan er komið orðatiltækið „að drepa úr dróma“ sem merkir „að leysa úr fjötrum“.

Æsir voru farnir að örvænta og sendu Skírni í Svartálfaheim þar sem hann fékk dverga til að búa til fjötur úr 6 hlutum:

  • Dyn kattarins
  • Skeggi konunnar
  • Rótum bjargsins
  • Sinum bjarnarins
  • Anda fisksins
  • Hráka fuglsins

Nýting þessara hluta í fjöturinn skýrir ástæðu þess að þeir eru ekki (lengur) til. Sá fjötur nefndist Gleipnir og leit sakleysislega út, mjög lítill og þunnur, en var í raun búinn göldrum. Úlfurinn áttaði sig á því að æsir voru að reyna að plata hann vegna þess hve fjöturinn var smár en goðin sannfærðu hann um að ef hann gæti ekki sjálfur losað sig myndu þau losa hann og því til sönnunar lagði Týr hönd sína að veði í gin úlfsins. Fjöturinn slitnaði ekki og missti Týr höndina því að goðin losuðu úlfinn að sjálfsögðu ekki. Fenrisúlfur stendur síðan bundinn í Jötunheimum til ragnaraka.

Ragnarök

Völuspá segir að í ragnarökum muni Fenrisúlfur losna úr fjötrum sínum. Hann mun verða svo stór að gin hans nær frá jörðu og upp í himin er hann gapir. Fenrisúlfur mun berjast við Óðinn í ragnarrökum og mun vega hann. Víðir, sonur Óðins, mun hefna hans með því að stíga með öðrum fætinum í neðri góm úlfsins, en teygir hönd sína upp í efri góm hans við himin og kjálkabrýtur hann.



Færslusafn

Viðburðir
No events
Hvernig á að hjóla í hóp

© 2013 Vélhjólaklúbburinn Fenrir